مطلــوب رئــيس

مطلوب رئيس

...................

يكون جميل

مش مهم يكون سمين أو نحيل

ويكون قد المسئولية

لو كلّفوه يقدر يشيل

يتحمل الحمل التقيل

ويكون شباب

ومش عجوز أو عليل

لو تاه في يوم

يقدر يعود من غير دليل
ويعدل كفة الميزان
لو في يوم بدأت تميل

..................

ويكون صبور

على شعبه لو يوم يثور

مايخفشي من ضلمة

لكن يحب يعيش في نور

غاوي الحياة زي الجميع

مش غاوي عيشة القصور

ويدور مع الدنيا

لو صممت في يوم تدور

لو مرة  يعبر سكته

ما يقولشي أنا بطل العبور

...................

ويكون حسيس

وابن أصول ومش خسيس

ومش في كل مشكلة

يطلع ينادي للبوليس

ويسيب لغيره حاجة ياكلوا

مش يلهف الفول والدريس

ولو في مرة عارضوا رأيه

يقفل على النهر الهاويس !

ويكون مثال للعدالة

ما يفرّق بين حمزة وموريس
ولابين مشيرة والواد عويس

....................

ويكون تمام

مايكونشي ليه شلة لئام

ويبعد عن شغل الرئاسة

كل ولاده والمدام

ويكون مثل للإلتزام

ماتكونشي كل انجازاته

كوبري ومحطة ترام
ودايما ايده نضيفة
ولا عمره يقبل الحرام

ويكون شجاع وقد الكلام

مش يطاطي للصهاينة

ويقول أنا بطل السلام

.................

ويكون جدع

مايعيشّي وحده في منتجع

والشعب مش عارف يعيش

شعب مرارته بتنفقع

عند غاز أو فرن عيش

خلاص ما عدشي ينخدع

بكلام والفعل مافيش

ويعرف إنه ها يتخلع

لو جنابه  ما يختشيش

يسترجل ويبطل دلع

والكل هايقوم يسنده

لو يوم وقع

....................

قصر الكلام وباختصار

مين اللي يرضى بالشروط دي

يكون رئيس

........................

ناصر أمين