كارو وحمار وحمّار

كارو وحمار وحمّار

بلدى عربية كارو بيشد فيها حمار

شايلة على ضهرها م الهم كام قنطار
واللى راكبها عويل عمره ماكان حمّار

شخط العويل فى الحمار وقال له يلا شى
رد الحمار عليه بصوت مافيهوش هزار
ماتخللى عندك نظر يامفترى ياجبار
ازاى هاقدر أمشى وطريقى مفروش نار
اشيل رجلى عن حفرة ألاقي  كوم أحجار
هو البعيد اتعمى مابشوفشى م الغربال
شيل الحفر والحجارة وصلح فى المســار
وبعدين تقول لى شى أجرى كما الجرار
لكن تقول لى شى ورجلى فى الأقذار
دا حتى يبقى حرام عليك وأكبر عار
مش كل من ركب الفرس خيال
ولا كل من قال شى للحمار  حمّار