تلاتين سنة والمركبة تايهة
والشط مش باين والطوفان جايها
أصل قبطانها عمره ما كان قبطان
واخدها بالفهلوة والكدب والطغيان
رافع على قلوعها راية سودة بجمجمة إنسان
خدنا معاه للعتمة واهو كان اللي كان
تلاتين سنة واحنا في دوامة ماتنتهيش
راح اللي راح واللي راح ما يجيش
وفي يوم ماكان يحتفل بعيد أمنه
قمنا بثورة شعب ساندها الجيش
وأمنه اللي كان فارد شراع ظلمه
يومين وتالت ورابع كأنه ما فيش
والشعب في الميدان قالها مدوية
هو اللي يمشي احنا ما بنمشيش
خلعناه والخلع جابه من جدره
ويسقط الطاغي والشعوب بتعيش
