قوم يامصرى طفى نارك
ايه يفيدك بانتحارك
وانت ميت مش هاتفرق
وانت صاحى تجيب نهارك
والقرار يصبح قرارك
قوم يامصرى طفّى نارك
...........................
كنت فين يوم مازور
يوم ماغلىّ عيش وسكر
يوم ما عيّشنا فى طوارئ
ياما عددنا فى مساوئ
وانت نايم جوة دارك
قوم يامصرى طفّى نارك
..........................
قوم يامصرى شد حيلك
لو ولعت انت وجيلك
راح منين حقك يجيلك
الكراسى زى ماهى
وانت رحت لحال سبيلك
قوم دا مجدك فى انتظارك
قوم يامصرى طفّى نارك
.............................
طفى نارك عن هدومك
لو هاتولع ايه لزومك
خللى نارك جوة قلبك
يوم ماتخرج مين يلومك
خللى نارك للى ظالمك
للى بيزود همومك
قوم وصحح من مسارك
قوم يامصرى طفى نارك
..........................
خللى نارك للى داسك
للى هان أهلك وناسك
حط عقلك جوة راسك
وانت عارف فين خلاصك
قوم بقى انهض وشارك
قوم يامصرى طفّى نارك
ليست هناك تعليقات:
إرسال تعليق