الأمر تحت السيطرة ( عبارة مألوفة )
...................................................
الأمر تحت السيطرة
قايسين حالتنا بمسطرة
إن جيت في يوم قلبك تعب
على طول هانعمل قسطرة
و لو في يوم عقلك شطح
نعمل أوام الرسترة
أما إذا عجلك وقع
هاتلاقي أحسن بيطرة
عيشتكوا حلوة مسكّرة
مين قال عيشتكوا ممرّرة
ها تعرف أحسن منّنا
ما بلاش أمور المسخرة
دا احنا الحكومة يا جدع
في خدمتك متسخّرة
شفت إحنا عملنا إيه
ويا اللي قاعدين في طرة؟!
طب أقول لك إنت بتاكل ايه؟
كفته وفراخ متحمّرة
والعيش جميل والغاز كتير
خلاص ماعدشي طوبرة
وتخرج تقول اللي انت عايزه
فضينا إمتى مظاهرة؟!
والأمن في الشارع تمام
والإنفلات مش ظاهرة
الثورة قامت وانتهت
فليه أمور المنظرة !
خطوتنا دايما للأمام
مين قال خطاوينا لورا ؟!
مصر لن تركع لحد
دي مصر حرّة محرّرة !
قوم نام بقى وشد الغطا
لازمتها ايه النخورة ؟!
ناصر أمين
